Нэгийн биш нилээдийн цаадахыг харчдаг байгаасай

Өнөөдөр ажил дээр жаахан бухимдалтай өдөр өнгөрлөө. Би бол хүн л надад эвгүй зан харилцаа гаргахгүй бол хүний дургүйг хүргээд байдаг хүн бол биш л дээ. Ажил дээр жижиг сажиг алдаа, асуудлууд гарч л байдаг. Тэр тохиолдолд үнэхээр миний буруу бол буруугаа хүлээж, уучлал хүсч чаддаг нэгэн би.  

Гэтэл миний буруу байхгүй зүйл дээр ажлын маань залуу бас үйлчлүүлэгч ах 2 над руу орилж, угзчин их муухай харьцсан. Яахав дээ хүмүүсийн ууртай байгаа үеийн жижиг сажиг онцгүй харилцааг инээгээд л өнгөрөөчихдөг. Гэхдээ яагаад ч юм өнөөдөр миний дургүй хүрэх гэхээс илүү гайхшрал төрлөө. Хоёулаа эргээд надад уучлаарай гэж хэлээгүй ч, тойруу утгаар намайг аргадан хэдэн үг хэлсэн л дээ. 

Тэгээд би ингэж бодлоо. 

Ер нь л зөвхөн энэ тохиолдол ч биш, өөр олон тохиолдлуудаас харахад, хүнийг загнаж, шавдуулж байгаад нэг удаадаа ажил нь бүтэж болно. Гэхдээ ажил, амьдрал гэдэг богинохон юм шиг хирнээ бас л олон зүйл тохиолдож болох урт зам шүү дээ. Хүн болгонтой налиганаж, хүн болгонд таалагдах албагүй ч хэн нэгнийг гомдоож, хэн нэгэнд муухай үг хэлж, хэн нэгнийг тавгүйтүүлж, хэн нэгний дургүй хүн болж үлднэ гэдэг зөв сонголт биш л болов уу. 

Мөн би өөрийгөө өнөөдөр хүчирхийлэлд өртсөн гэж үзэж байна. Биеийн болон сэтгэл санааны хүчирхийлэл хоёул байсан. Яагаад гэвэл, 

1. Үйлчлүүлэгч ах намайг сулхан ч гэсэн угз татан биед маань хүрсэн. 

2. Над руу орилж, зандчисаны улмаас би өдөржин сэтгэл санааны хувьд таагүй өнгөрөөсөн. 1 цаг ч бай, 1 минут ч бай, 1 өдөр ч бай, миний амьдралын цаг хугацааг тайван бус, аз жаргалгүй болгосоноороо намайг хохироосон. Миний цаг хугацааг хулгайлсан. 

Тэгээд би ингээд л хохироод үлдэх үү. Хохирогч болон үлдэхгүйн тулд би юу хийж чадах вэ. Тэд надад хандсан шиг эрүүлээд тэгж хандах уу? Үгүй ээ, тэр бол зөв шийдэл биш. Ямар ч ид шидтэн биш л бол, хэн ч ирээд миний өнгөрүүлсэн аз жаргалгүй мөчийг буцааж чадахгүйгээс хойш, илүү их хохирохоосоо өмнө би тэр зүйлд анхаарлаа хандуулахаа зогсоосон нь дээр. 

Ингээд би тэднийг зүгээр л мартаж, уучилж, ойлгож, асуудалд цэг тавилаа.

Хүмүүс нэг нэгэндээ хүндэтгэлтэй, хүлээцтэй бас асуудлыг хэнээс болсоныг мөрдөн шалгаах биш, юунаас болсоныг тогтоож, буруутныг чичлэхээс илүүтэйгээр асуудлыг шийдэх гарц хайдаг байгаасай.